Montag, 20. April 2009

HSR - E2000 - Kulturreise 2009.... hamburg...


bevors uf india ghat, han ich dänkt ich brüchi no bizli europäische usgang... und darum isch die obligat kulturreis vo dä hsr agstande....




tja, wie gseit händ sich au das jahr wieder 8 ehemalige e2000-studänte (also eigentlich 7 und no ein komische vom e2001) uf die jährlichi kulturreis gwagt... s'ziel isch gsi, dass niemert überfalle wird... voila, hämer für eimal au gschafft...



hamburg die hafestadt an der elbe... eigentlich würkli ganz nett... guet mir händ au 3 täg kei wolke gha... schöni sach gsi, au wenn d'reeperbahn chli ä entüschig gsi isch... einzigs highlight adere bekannt strass isch für eus d'9er currywurscht gsi... ich han dänkt ich mües sterbe, so scharf war das ding...




eigentlich isch es ganz es gemütlichs weekend gsi... eigentlich fascht scho zu gemütlich... zum glück hät eus a eim abig dä guet long-island gretted.. und am zweite namitag, dänn dä dear old friend vodka... wobi da zsäge wär, dass es nöd allne würkli guet tue hät... aber au wenn d'reeperbahn nöd super gsi isch, häts doch viel schöni plätzli gha... dä hafe natürli und dänn das neue quartier wo ide letschte jahre entstande isch, hafen-city... amene schöne tägli, isch au de elbstrand sehr z'empfehle....





usgangmässig häts rund um d'reeperbahn vieli barene... dä sommersalon isch da ä top location, je nach usgseh chunnt mer aber nöd inne :-) ide früe morgestunde het dä goldig pudel no offe, isch aber chli ä komischi adrässe... oder am sunntigmorge isch dä fischmärt natürli än guete place, wos erstundlich abgat, mit band und tanz...



all in all ischs wieder än guete, wenn au stränge, und lustige usflug gsi... bliebt nur hoffe, dass es nögscht jahr wieder äs kulturreisli git, mal luege ob südafrika oder ebe doch tel aviv ;-)

0 Kommentare:

Kommentar veröffentlichen