INDIA NEWS

DANKE!!

mer möchtet üs zerscht bi allne bedanke für die viele liebe & guete wünsch für üsi reis. Fuer die viele gschriebne briefli & gschänkli. Mer händ a jedem einzelne uh freud gha und schätzeds, üch als üsi fründe dörfe zha. Es sind zwei mega schöni abschiedsfäscht gsi.
Merci no einisch a allne!!

INDIA NEWS
mer händ scho paar sache über de inder & sis land usegfunde - das wämer üch nöd vorenthalte:
sehr hilfsbereit – fahrt eim überall mit sinere riksha häre / au wenn mer als fahrgäscht no händ müsse sis drü rad stosse (bi 42 grad) wills de geist ufgäh häd ;-)

sehr en guete choch – sässe isch fantastisch

fleischlosi gricht sind immer no die beste & werdet vo üs bevorzugt – GENAU wäge sörtige bilder

wenn binere 2-tägige busfahrt de europäer während de nacht sis gepäck nöd wett ufem busdach loh, denn muess er halt am morge am 5i sin rucksack au sälber wieder ufehieve.

wien en richtig iheimische chan de dani au steitürmli baue :-)

guet, mer nämed das zimmer! Wo isch dänn sWC und sBrünneli?

Tag 32: Jaisalmer (Rajasthan, India)

Tausend und eine Nacht & 3 Stunden Wartezeit

aso für de dani isch das jo ziemlich hert gsi. Am 4:10 isch de wecker abe und trotz nöd möge ufstoh sind mer als schwiizer pünktlich am bahnhof gsi. Wo üs au scho en tafele informiert: zug nach Jaisalmer vom 5:15 häd 1 ½ stund verspötig. Tja.....was ez.....möched mers wie alli inder sitzed an bode & trinkend mol en frische chai tee wo vo mobile äss & getränkeständ ufem perron für 10 Rappe serviert wird.

Am schluss sinds denn 2 ½ h warte gsi. Unglaublich aber wahr, es isch mega schnäll verbi gange & absolut interessant gsi. um üse „bode“-sitzplatz häds gli ä riese gruppe iheimischi mitemene chline bueb gah. Mer sind attraktion gsi & obwohls keis wort änglisch händ chöne, händs welle das mer sie fötelet, das mer de chli bueb hebed & welle mit üs pläuderle. Isch no schwierig gsi, mer verstönd halt immer no kei hindi ;-) am mobile ässensstand hämer chöne zueluege wie teig für gfüllti teigtäsche oder brotfläde grad frisch ufem perron gmixt worde sind. Anderi händ zäh putzt und dratte sind flissig zwüsched de gleis hi und her gsprunge.

mit schlussändlich über drü stund verspötig und ca. 1kg sand im mage (häd nome liecht gstüübt wo de zug dür dwüästi bruumt isch) simmer denn ide wüästestadt Jaisalmer acho. Mer händs üs natürlich nöd näh loh sonen romantischi kamelsafari zmache – vo dsandstürm, wundgrittnigem füüdli und ungeniertä kamelfürz abgseh, isch es en unglaublich schöns erläbnis gsi. Wenn chönd mer scho mol wieder ide wüästi under freiem sternehimmel schlofe?

Mer sind mit vier kanadier unterwägs gsi und sind vo üsne iheimische kamelfüährer richtig kulinarisch verwöhnt worde. Sie händ uf offnem füür ide wüästi üs en znacht & es zmorge zaubered. Serscht mol i üsem läbe hämer freiläbendi antilope gseh & überdimensionali grossi chäfer. Die brüätendi hitz und überall sand, händ de usflug abgrundet.

Ez versueched mer üses glück mol mit echli süüdlicher zgoh um ändlich mol chöne üsi füäss im arabische meer zbade.

Tag 25: Jaipur (Rajasthan, India)

dä inder häts gern lut, chaotisch, farbig, duftig... er fühlt sich ganz eifach am wohlste wenn äs riese chaos isch... vo usse gsehts amel so us als wür das riese durenand sich wie ä spirale beschlünige... d'lüt redet immer lüter mitenand, vo hinteräm egge chömed no meh lüt, töffli und rikshas hupet ununterbroche, da lauft ä chue zmitzt über dstrass und am strasserand wüelet paar geissene im müll... wer no nie in indie gsi isch, cha sich das gscheh nöd vorstelle... und wer än schritt witer ghat und sich as wirrsal wet gwöhne, ja de mues lang lang durd strasse vo indie laufe... mir sind immerno am laufe... äs isch ja amel meh äs durd strasse kämpfe... eigentlich schad, dänn det haltet mer eus suscht gern uf, det isch mer am puls vom inder... det wird gschlafe, gässe, mär wäscht sich, es wird tee trunke, diskutiert oder mer betriebt sis lädeli mir irgend welchem ramsch... und mer chan sicher si, dass sämtliche 10 läde links und au rächts, genau dä glich schnickschnack verchaufet...

dä inder isch wie äs bienli... er isch immer irgendwas am mache und isch er mal nüt am mache und gseht dich, dänn wirbelt er dir sis gebrochene änglisch um de chopf... chasch sicher sie, jede inder wo der irgendwie wet in irgendändere art hälfe, de isch im tourismus tätig... aber nöd als guide, sondern die verdienet sis gäld vo dä touris, am liebste in dems touris verarschet oder abzocket... und jaaaa, au eus häts mal wieder breicht, mir travel-rookies :-) ä langi gschicht, eigentlich zimli doof, aber im nachhinen halb so wild... schlussändlich hämer 35fr. in sand gsetzt für äs busticket womer dänn gar nöd brucht händ... naja, paar bier und souvenirs weniger und dänn isch das wieder dine :-)

während mer vo dä einte inder viel geduld und skepsis lernt, entgägnet eim die andere (die wo nöd im tourismus tätig sind) mit viel respäkt, offeheit und fründlichkeit... mer wird i ihrem land willkome gheisse als gast und fründ.... und äs vergaht kein tag, dass irgendöppert wet mit eus ufem föteli posiere, aber nöd öppe für euses album, nei dä inder isch stolz uf ä errinerig mit zwei wisse touris :-)

s'thema schlafsack isch vorerscht abgschlosse, dä mir eus momentan am rand (jaipur) vom wüestestaat rajastan befindet... mit viel wasser quälet mir eus dur d'hitz :-) obwohl jede tag äs abentür birgt mit zwiefel und unsicherheit, fühlet mir eus in indie immerno pudelwohl...

Tag 18: Manali (Himachal Pradesh, India)

was händ en buddistische mönch, än chline bueb und ä heissi blondine gmeinsam, wenns über dä zweit höchsti Pass vo dä wält fahret? genau, alli drü müend unterwegs go chotze :-) aber alles vo vorne:

nach 10 wunderschöne täg ide bergwält vom himalaya in Leh, hämer dänkt es isch zit für ä witeri etappe... vo Leh gits genau drü möglichkeite weg zcho: per flüger nach delhi oder per passstrass nach srinagar (vo det simer cho) oder als letschti möglichkeit, ä busfahrt über die zweithöchst passstrass vo dä wält nach manali... problem: die strass isch nach em winter offiziell nonig göffnet, sodass no kei büs fahret... nach langem sueche hämer dänn aber usegfunde, dass privati minibüs die strecki bereits fahret... so hämer dänn bi irgend ämene typ am busbahnhof äs ticket (äs vo hand gschriebnings fötzeli) für de nögscht tag postet... abfahrt 01h00... s'bstellte taxi isch dänn natürlich nöd ume gsi, sodass mir um mitternacht mit sack und pack an 45min entfernte busbahnhof händ chöne laufe... guet, uf halbem weg isch dänn das taxi eus mit „liechter“ 30 minütiger verspötig doch no entgägecho... d'fahrt uf manali isch eigentlich ganz ok und au superschön gsi... bis uf zwei chlinigkeite: erstens isch äs mitte ide nacht uf knapp 5'500m doch äs bitzeli chalt (dass die minibus kei heizig händ,verstaht sich in indie vo sälber) und die total sächs päss womer uf dä fahrt händ müese überstah sind nur äs „biz“ kurverich gsi... tja, und so isch es cho, dass dä mönch, än chline bueb und ebe d'nadja sich händ müese übergeh :-) äs witers highlight isch dänn gsi, wo zmitzt uf de strecki ä brugg zimli kaputt gsi isch und nüt meh witer gange isch... mir händ eus scho mal uf ä nacht im freie igstellt... doch die viele chline, gschaffige und herzige inder händ überleit und berate und nach lösige und alternative gsuecht... und nach 90min isch dänn die brugg behilfsmässig, irgendwie wieder passierbar gsi...nach 19h passfahre simer dänn doch zimli froh gsi, dass mir safe in manali acho sind...

manali... äs kaff irgendwo im himalaya uf guet 2'000m... bi inder bekannt als ferie- und honeymoondestination... wie allseits bekannt, isch ja GOA das droge- und party-mekka für alli ghangne bliebne europäer in indie... voila, ez aber was machet die wenn dä monsun chunnt in goa vo juni bis septämber? Mir händs usegfunde: alli die gönd dänn uf das besagte manali... da laufed nämli überall schrägi lüt ume, zmitzt am namitag ertönt luut technomusic und äs paar dutzend bekiffti lüt tanzed wie wild im garte... isch also ganz amüsant da, mir fühlet eus richtig wohl :-)
tja, und da dope und trance nöd unbedingt dä grund für euse bsuech in indie isch, gömer morn au scho wieder witer richtig mcloed ganj, wo his holiness dä dalai lama läbt...

Tag 13, 14 & 15: Wuchenänd usflug / trekking

13. Tag: Besuch Kloster in Alchi und Likkir

mer händ dänkt so zur abwächslig chöntet mer en weekendtrip mache. Do mer immer no im himelaya sind, häds gar kei anderi möglichkeit gäh, als go ztrekke!! mit üsne zwei tagesrucksäck simmer denn mit em Taxi vo Leh nach Alchi gfahre (das chloster müess mer gseh ha)
okay mer händ das chloster denn glaub in rekordziit aglueget gha.


Wiiter isch es zu üsere erste übernachtigsmöglichkeit gange in Likkir. Au döt häds es chloster gha. Ganz speziell gsi. Es häd kein einzige mönch ume gha, ussert enere alte frau wo x mol ums chloster spaziert isch und üs zwei... au sganze dorf isch wie usgstorbe gsi. Mer nänned de ort ez GEISTERSTADT.







Zrug im hotel simmer fascht gnau so elleige gsi. Häd no eis päärli gha wo sich aber uf ihres zimmer verchroche häd und nöd eso häd welle mit üs pläuderle. Ja guet, häds halt es candlelight dinner gäh für üs zwei :-)



14. Tag: Trekking Likkir – Sumdo – Yangthang – Hemis Shukpachen

Luut üsem wanderbüächli macht mer dä trek vo likkir nach hemis i zwei täg, mer händ das aber welle i eim tag schaffe. Swätter isch leider echli durzoge gsi, so dass mer zwüsched sunne, schneechörner und starche windböe alles gha händ. Mer händ drü päss erklumme: De 1. easy, de 2. ganz passabel und de 3. häd und häd nüm welle höre.


Aber ihr gsähnd sziel hämer erreicht. OLE

Mer händ dänkt, do heigs sicher no es paar touris ume wo au die strecki möched aber nüd isch gsi. Muetterseele elleige simmer nach Hemis Shukpachen glofe. Döt häd üs denn en iheimischi abgfange und üs ihres gästehuus iglade. Uf steiherte matratze hämer denn pfused. De indisch znacht isch sehr fein gsi, aber allerdings isch denn de zmorge echli spärlich gsi. Nach dem mer dänn gseh händ, dass de butter sid im august 2007 abglofe isch, hämer die brotfläde troche abegwürgt :-)


15. Tag: Hemis Shukpachen – Ang – Temisgam –Nurla – Leh

guetgluunet und bi herrlichem sunneschiin simmer los maschiert. Mer händ gwüsst, dass mer de weg nöd so easy gfindt und sich d'lüt amigs verlaufet. Tara, üs wird das natürlich nöd passiere. Okay, ufem 1. hügel acho. Welle wäg ez??? echli en breiteri schotterstross oder zwei so iheimischi pfad? Guet schotterstross häd gwunne, doch nachemene wiili isch fertig gsi: En riise felse und fertig stross. Demfall wärs denn halt doch sonen iheimische pfad gsi. Tja, nach dem umweg hämer dänn aber doch no dä nöchschti pass erzwunge!



Denn isch es as gemütliche abelaufe gange. So nach ca. 2 ½ h simmer denn in Nurla itroffe, wos gheisse hät warte uf dä bus. Nach 40 min. warte isch er dänn ändli cho. Docj de bus isch leider echli lahm gsi. Händ scho üsi hilf zum stosse welle abiete... Mir händs denn aber doch no gschafft und sind nach ca. 3 ½ h wieder „diheime“ in Leh acho.

Tag 9: Leh (Ladakh, India)

eigentlich hämer ja vo afang a uf leh welle, will aber de flug uf srinagar einiges günstiger gsi isch, händ mir dä umweg in chauf gno und eus nach srinagar uf die zweitägig busfahrt nach leh gmacht... mit emene chrüpel-bus ich es uf die 450km lang passstrecki gange... de ersti teil isch ja ganz gemütlich gsi, aber nach einige stund fahrt isch es uf die absolut mörder-one-way-pass-strass gange... die neu achterbahn im europapark isch en scheiss dägäge... d'natur strass isch genau eis auto breit gsi, links meterhöchi schneemurene und rächts, hilfo, hunderti meter s'loch ab und vo leitplanke keine spur...

nachere nacht im chline kaff kargil, stundelangem bluet schwitze und total 23 stunde busfahre simer dänn doch sicher in leh acho... umringt vo schneeberge ghört leh zu de region ladakh, lit uf 3505m über Meer, mitte im Himalaya und isch s'Trekkingmekka in indie... und da fühlet mir eus so richtig wohl... mir händ äs super hotel gfunde für 12 Fr. mitere fantastische ussicht usem bett uf all die verschneite berge...

eusi erste drü täg in leh händ us biz sightseeing, ässe und eifach chli si bestande... mir gnüsset eus und die zit da ide berge eifach mal chli... offiziell fangt d'saison erst ändi juni a, sodass es no ruhig isch in leh (mal abgseh vom einzige Bancomat, womer gester 1h agstande sind, aber das isch ebe indie) mir werdet da sicher no einigi täg bliebe und au s'einte oder ander mehrtägige trekking mache... und suscht simmer ganz eifach am s'läbe gnüsse :-)