mer händ dänkt so zur abwächslig chöntet mer en weekendtrip mache. Do mer immer no im himelaya sind, häds gar kei anderi möglichkeit gäh, als go ztrekke!! mit üsne zwei tagesrucksäck simmer denn mit em Taxi vo Leh nach Alchi gfahre (das chloster müess mer gseh ha)okay mer händ das chloster denn glaub in rekordziit aglueget gha.
Wiiter isch es zu üsere erste übernachtigsmöglichkeit gange in Likkir. Au döt häds es chloster gha. Ganz speziell gsi. Es häd kein einzige mönch ume gha, ussert enere alte frau wo x mol ums chloster spaziert isch und üs zwei... au sganze dorf isch wie usgstorbe gsi. Mer nänned de ort ez GEISTERSTADT.Zrug im hotel simmer fascht gnau so elleige gsi. Häd no eis päärli gha wo sich aber uf ihres zimmer verchroche häd und nöd eso häd welle mit üs pläuderle. Ja guet, häds halt es candlelight dinner gäh für üs zwei :-)
14. Tag: Trekking Likkir – Sumdo – Yangthang – Hemis Shukpachen
Luut üsem wanderbüächli macht mer dä trek vo likkir nach hemis i zwei täg, mer händ das aber welle i eim tag schaffe. Swätter isch leider echli durzoge gsi, so dass mer zwüsched sunne, schneechörner und starche windböe alles gha händ. Mer händ drü päss erklumme: De 1. easy, de 2. ganz passabel und de 3. häd und häd nüm welle höre.Aber ihr gsähnd sziel hämer erreicht. OLE
Mer händ dänkt, do heigs sicher no es paar touris ume wo au die strecki möched aber nüd isch gsi. Muetterseele elleige simmer nach Hemis Shukpachen glofe. Döt häd üs denn en iheimischi abgfange und üs ihres gästehuus iglade. Uf steiherte matratze hämer denn pfused. De indisch znacht isch sehr fein gsi, aber allerdings isch denn de zmorge echli spärlich gsi. Nach dem mer dänn gseh händ, dass de butter sid im august 2007 abglofe isch, hämer die brotfläde troche abegwürgt :-)
15. Tag: Hemis Shukpachen – Ang – Temisgam –Nurla – Leh
guetgluunet und bi herrlichem sunneschiin simmer los maschiert. Mer händ gwüsst, dass mer de weg nöd so easy gfindt und sich d'lüt amigs verlaufet. Tara, üs wird das natürlich nöd passiere. Okay, ufem 1. hügel acho. Welle wäg ez??? echli en breiteri schotterstross oder zwei so iheimischi pfad? Guet schotterstross häd gwunne, doch nachemene wiili isch fertig gsi: En riise felse und fertig stross. Demfall wärs denn halt doch sonen iheimische pfad gsi. Tja, nach dem umweg hämer dänn aber doch no dä nöchschti pass erzwunge!Denn isch es as gemütliche abelaufe gange. So nach ca. 2 ½ h simmer denn in Nurla itroffe, wos gheisse hät warte uf dä bus. Nach 40 min. warte isch er dänn ändli cho. Docj de bus isch leider echli lahm gsi. Händ scho üsi hilf zum stosse welle abiete... Mir händs denn aber doch no gschafft und sind nach ca. 3 ½ h wieder „diheime“ in Leh acho.
2 Kommentare:
Hey ez chan mer ändli en kommentar ine schriebe ;-) ier send ja di geilschte.. wanderet dur dgeisterstadt und würget trockni bröli abe ;-)) aber das ghört halt alles dezue und ich glaube ier zwei bruchet das au echli! isch immer weder spannend vo üch zläse !! hüt isch fiirtig do ide schwiiz und ich gange am abig zu de eli.. wiiber dvd abig ;-)))
muah dicke knuddl eui beidne und hebet sorg !!!!!
äähhmmm... ich bes Dnici... dass ier no wüsset vo wem de kommentar isch ;-))))
Kommentar veröffentlichen