Montag, 23. November 2009

Tag 180 – 183 Mildura (Australia)

Wiedermal häts gheisse umweg mache (+500km) und is landesinnere fahre, weil in ide nöchi vo mildura müeses än super schöne Nationalpark ha... leider isch es für eus aber nüt worde mit dem Park: am tag 1 isch dä park wäge bushfire gfahr gschlosse gsi (keis wunder bi 40°)i... am tag 2 häts nur grägnet (sit 6 jahr nüme so vill)... und am tag 3 & 4 isch d'naturstrass wo in park gfüehrt hät gschlosse gsi, weil überschwemmt... tzzzz...
mir händ jedoch d'zit mit nöd minder-sehenswerte naturspektakel (Sandy Perry Dunes) und vorallem mit schwümme tod g'schlage :-)

Freitag, 20. November 2009

Tag 178 – 180 Grampians Nationalpark (Australia)

Nach dä ville Chüeche und äm Stadtläbe in Melbourne häts eus natürli wieder id natur zoge und mir händ eus uf chli wandere im grampians nationalpark gfreut... leider simmer dänn doch nöd so lang idem wunderschöne park bliebe wie plannet und zwar wills am Dani ganz eifach zviel Flüge gha hät (sölled nöd die letschte gsi si)... ganz tatelos simmer aber nöd gsi und händ doch dä einti oder anderi walk gmacht und das bi brüetender hitz... schweiss, schweiss...

Samstag, 14. November 2009

Tag 161-174: Sydney to Melbourne (Australia)

Vo de hauptstadt Canberra händ üs so alli iheimische schwiizer in sydney abgratet. Nichts desto trotz hämer üs i die stadt gwagt und es isch doch ganz hübsch gsi dette. Gemütlich hämers gno, uf en berg grännt simmer für die schöni ussicht und ewigs im zimli interssante war memorial museum umegstolperet...


Mount Kosciuszko isch de höchsti berg vo australie. Die möglichkeit de zbestiege hämer üs nöd entgoh loh und sind für 3 nächt id snowy mountains gfahre. Es hübsches skiörtli hämer döt gfunde und herrlichs wätter zum de berg, wo für üs eher en hügel isch, zbestiege. Mit kapuze dobe und händsche a, simmer dür die restliche schneefälder marschiert & händ de gipfel vo 2228m erklomme.


Lang simmer nöd elleige gsi und mer händ wieder dörfe mit lüüt us de schwiiz zwoi lässigi öbig verbringe. Mit holdeners häts sogar äs obligats jump föteli ghe, sogar de colin gumpt höcher als ich.... ganz spontan und unerwartet sind denn d'eltere vo de nici üs ufem campingplatz über de wäg gloffe, mit zwei fläsche wii hämer üs viel zverzelle gha.

Nach mehrere empfählige ischs dänn in „wilsons promontory national park“ gange. Diräkt am meer, zmitzt im wald campe und wunderschöni buchtene zum bade und en super ussicht vom mount oberon. Das hämer natürlich au welle gseh. Und mer sind am morge früäh uf und händ de berg bestiege......tja, d'ussicht isch dänn leider doch nöd so toll gsi, wie alli dävo gschwärmt händ, aber das isch wohl eher a eusem näbel-päch gläge...