Tag 278: Hoi An (Vietnam)

äs isch abig, mir sind liecht gschafft vom flug vom kambodscha und händ eigentlich nur hunger... bevors aber is resti gaht, chömed mer nöd usem stunne use... hoi an isch würkli än ganz herzige fläcke... leider chli überquillt mit touris, aber das simmer eus nach angkor wat gwöhnt...

hoi an isch wältkulturerbe und das nöd umesuscht... dutzende 200-jahr alti chli hüsli sind stillvoll i iheimischi restaurants umgwandlet worde... und will grad no chinese new year gsi isch, hanged überall idä auto-(und teilwis töffli)-freie innestadt farbigi lampion... und nöd nur das, au dä mit palme gsäumti strand laht sich also gseh...

äs chliners übel sind jedoch die über 500 schniedereie... a jedem egge wird versuecht eim än massgschniederete azug oder jagge azdreie... mir sind ja schliesslich nöd zum gspass da, daher löhnd mir eus natürli au imulme und decked eus mit feinsten klamotten i :-)

Tag 274: Siem Reap / Angkor Wat (Cambodia)

die grössti religiösisti stätte vo de wält befindet sich in kambodscha... ANKOR WAT... natürlich chan sich jede vorstelle, dass das lüüt vo de ganze wält azieht... aber das es grad esoooo viel lüüt hät, dass hättet mer ez scho nöd grad dänkt. bis ez hämers fascht überall gschafft am turi strom zentcho...aber do häd sogar am morge am 5:15 uf de matte stoh nüd gnützt. geschweige en sunneuntergang zgnüsse ohni lüüt - schlichtwäg unmöglich...


egal! idrücklich isch es uf jede fall gsi... ganz gewaltig was d'khmer lüüt zwüsched em 9 und em 15 jahrhundert uf dbei gstellt händ... äs isch eifach amazing gsi...


nach 8 stund budistischi und hindustische stei-tämpel hät eus dänn aber doch NAFT-Syndrom* verwütscht... so oder so ä gueti sach gsi ;-)


* NAFT = Not-Another-Fucking-Temple

Tag 269: Sihanoukville (Cambodia)

"ups nadja, bisch du sicher dass du dir das so vorgstellt häsch?" wer meint in kambodscha chöng mer in rue s'beachlife gnüsse, de isch leider falsch... so hämer eus die drü täg am strand sicher nöd vorgstellt...


janu, so hämer eus ändli mal uf es töffli traut und sind zu de andere stränd ide umgäbig gfahre... a dene hämer eus dänn doch no chöne entspanne, und aller einsamkeit die wisse stränd mit äm wunderschöne sunneuntergang gnüsse :-)

Tag 264: Mekong Delta (Vietnam)

Naiv wie mir sind, hämer dänkt das mers grösste chaos nach Indie hinder eus händ... weit gefehlt... das nämli au in vietnam s'chinesische neujahr (und das mitte im februar) gfiered wird, konnte ja keiner ahnen... 3 täg vor und nach dem ominöse fäscht lauft nämli im ganze land nüt... fürd vietnamese chunnt dänn wiehnachte, geburtstag und ostere zäme... janu NADA isch ja nöd uf dä chopf geit und hät nach em erste tag in vietnam bereits än plan: schnällscht möglich ausser land :-) drum simmer 3 tag is mekong delta, sind viel bus gfahre im stau und dänn via flussweg is nachbarland cambodia...


zum schluss no ä chlini sidestory vo saigon: im hauptpostamt vo saigon schaffed dä letschti „briefeschreiber“ vo saigon (u.a. für lüt wo nie händ glernt schriebe)... dä herr Ngo... natürli hät en bsuech bi ihm bi dä arbet nöd dörfe fehle... wo mir ihm die aktuellsti usgab vom schwizer globetrotter-magazin zeiget händ, hät ers zerscht gar nöd chöne glaube und dänn wit über beidi ohre gstrahlet... schnäll isch er an nögste schalter mit em heftli und hät grad 10 kopie gmacht... und zwar über än artikel wo über ihn abdruckt worde isch... riese freud hät er gha und eus herzlich danked... lang hät er nöd zit gha zum plaudere... d'arbet rüefi, hät er gmeint... und so hät dä 79-jährigi sini kopie sicher i sini mappe verstaut, isch a sis chline pult mitte ide post ghocket und hät witer gmacht mit brief übersetze :-)