D’Original Transsibirischi Isebahn gaht vo Moskau
quer dur Sibirie as Japanische Meer nach Vladivostok. Churz nach em
Baikalsee zwigt die transmongolischi Variante ab und führt durd
Mongolei nach Peking. Das isch die Route wo die meiste Touriste mached.
Äs git aber no ä dritti Variante, die Transmanschurischi Isebahn. Die
zwigt nochli spöter ab und ghat direkt nach China und das isch üsi
Strecki...
Voller
Vorfreud uf China hämer eusi siebe Sache (ok es sind einigi meh) packt
und sind in K20 in richtig China. Eimal meh simer ufem ganze Zug die
einzige Touris gsi (wer gaht i dere Jahreszit au nach Sibirie?!?!). Da
s’chinesische Neujahr und somit die grosse Ferie ade Unis dure sind,
isch dä ganz Zug volle Stundänte gsi (und somit au euses Abteil). Da
d’Unis in China besser und günstiger sind, gänd villi Russe uf China go
studiere. Und so isch die 53-stündig Fahrt näbed ässe, läse, usem
Fänster luege zimlich unterhaltsam gsi.
Mir
händ ja scho äs paar Gränzübertritt ufem Buggel, aber de zwüsched
Russland und China isch ez doch chli langatmig gsi… ganzi 12h isch es
gange, d’Russe händ dä ganz Zug usenand gno (sämtlichi Abdeckige
abgschrubet), 4x häts Gsichtskontrolle geh (mer hät in Reih und Glied
müese anestah)… ja und suscht halt eifach warte und warte und warte und
warte… und nöd öppe wills drädli vom zug händ müese wächsle
(d’spurbreiti in Russland isch anderst als in China), will das isch i
guet 2h erlediget gsi…
Mir
händs dänn aber doch gschafft und händ s’hässlichi Gränzstädli in
Russland verlah und sind in China igfahre… und eimal meh simmer
überwältiged worde… bi dene chinesä isch eifach alles grösser, farbiger,
pompöser… Mer hät chöne meine mer seg in Las Vegas, die Gränzstadt vo
China hät riesigi Hochhüser gah und alles isch überbelüchtet und und
und…
0 Kommentare:
Kommentar veröffentlichen