Tag 31 / km 11'869: Harbin, China (-18°)

 

D’Stadt Harbin isch im Johr 1898 als Bahnstation dür d‘Russe gründet worde. Hüt isch sie die 10. grössti Stadt vo China. De Grund für üse Stopp isch s‘all jöhrliche wältwiit gröschti Snow and Ice Festival gsi. Ein Park häd verschiednigi Skulpture us Schnee zeigt und imene andere sind ganzi Gebäude us Iisblöck noche baut worde. Leider wüssed mer nöd wie viel abertuusigi Iisblöck do verarbeitet worde sind, aber zu dene Iisblöck chömeds vom zuegfrorne Stadtfluss Songhua River. Bi Tag gsähnd die Iisblöckgebäude ganz nett us, aber die Nacht wänn alles belüchtet isch, denn isch es eifach nome es wunderbars Märliland.
Mer sind begeisteret gsi. Bi -18 grad hämer üs fascht nöd chöne satt gseh vo all dene Baute. D‘Chinese händ au riesig de Plausch gha, dass mer vo gwüssne Iisgebäude häd chöene abeschlittle….au de Dani häd freud gha ;-) no agnehmer isch gsi, dass sehr gmüetlichi klassischi Musig gloffe isch. Aber nei nach jedem lied, häds irgendwelchi infos uf Chinesisch gäh, wo d‘Idylle vo dem Märliland gstört händ….aber mer sind jo in China, do isch alles echli lüüter :-)

  

 

 

 

 

 

Zum Schutz und vorallem zum Erhalt vo de sibirische Tiger häd mer in Harbin 1996 en Zucht & Ufziehstation gründet. Das Projekt isch sehr erfolgrich verloffe: dür verschiedenigi Sichtige vo de Tiger gaht mer davo us, dass sie sich i ihrem früäherige Revier wieder nieder gloh händ. Die unglaublich schöne, wilde und chräftige Tier händ mer üs natürlich nöd welle entgoh loh und händ üs uf en chinesischi Safari begäh. Jo mer sind denn mit x-Chinese ine Tourbus ipfercht worde und händ ca. 5 mol weniger als en minute pro Stopp chöne en Tiger fötele. Tiger händ riesigi Ghäg und werdet döt i verschiedene Statione uf ihri „Entlassig“ vorbereitet. Momentan läbet bis zu ca. 500 Tiger i dem Park.

 

Share