Mit de höchstglägne Isebahn (über 5‘000m) isch es i 24h vo Xining ufs Dach vo de Wält gange, gnauer gseit i die tibetisch Hauptstadt nach Lhasa. Si lit uf ca. 3‘600m und isch en Mix zwüsched buddhistischer Tämpelstadt und moderner chinesischer Grossstadt. Wobi sich s‘zweite zum Glück no im Rahme haltet, frögt sich nur wie lang no.
Dä Buddhismus isch allgägewärtig, i allne strassene gseht mer Pilger wo vo dä einte zu de andere heilige Städte pilgered. Mer fühled eus fascht chli inere andere Wält.
Da Tibet nach wie vor für dä westlichi Individualtourist gsperrt isch, hämer eus müese änere Gruppereis mit Fahrer und Guide aschlüsse. Wobi eusi Mini-Privat-Gruppe nur us 2 Persone bestaht :-) Dä grossi Vorteil vo euserer „Gruppereis“ isch, dass euse tibetischi Guide eus dä Buddhismus und di tibetischi Kultur nöcher bringe chan. Und so isch s’Sightseeing in Lhasa nöd äs abspuele vo verschiedene Chlöster (Drepung, Sera, Jokhang, etc.), sondern mer erfaht so was dähinter steckt.
S’grosse Highlight vo Lhasa isch aber ganz klar dä Potala Palast. Das riese Gebäude mit 1‘000 Zimmer isch bis zur Flucht vom Dalai Lama nach Indie (1959) dä Sitz vo de religöse und politische Füehrig vo Tibet gsi. Hüt isch es meh äs Museum mit unzählige Buddhastatue, dä Gräber vo de bisherige Dalai Lamas und für Tibeter än heilige Ort. Tusigi Lüt pilgered Tag für Tag rund um dä Berg wo dä Potala Palast druf isch. Für eus isch dä Start in Tibet eifach nur beidruckend.....
0 Kommentare:
Kommentar veröffentlichen