Nach dä Wildnistäg ide Kalahari hämer eus gfreut uf chli
entspanne in Maun bim Okavangodelta. Glichzitig hämer au alli eusi Permits und
Buechigä müese organisiere (isch liecht kompliziert, aber hät schlussändlich
doch alles klappet :-), sowie Proviant poste für eusi 4-Tages-Durchquerig vom
Moremi und äm Chobe Nationalpark.
Das mer in Botwana hutnöch mit Tier in Berüehrig chömed, ja
das isch eus klar gsi… Aber das eus dänn än blinde Passagier uf Trab haltet,
hetet mer dänn doch nöd dänkt. Und zwar hät sich ide Kalahari ä Muus is
Gepäckteil vo eusem Auto gschliche… Jetzt isch äs leider so, dass s‘Auto so
verbaut und usgrüstet isch (mit Chüelschrank, ibaute chistene, etc.), sodass
die Muus sich wunderbar hät chöne verstecke und mir eifach nöd a si anecho
sind… erfinderisch wie mir aber sind, hämer mitere wasserfläsche ä musefalle
baut und churzi ziit spöter isch euses Auto wieder „nagerfrei“ gsi :-)
Womer vor vier Jahr scho i dere Gägend gsi sind, hämer eus
ufgrund vo fehlender Usrüstig nöd uf ä Moremi/Chobe-Durchquerig traut… Aber dasmal
hämer eus das nöd neh lah… Aber wenn mers däbi hät dänn ischs ja klar, dass mer
Schufle, High-Jack, Sandleitere, Seili, Dieselkanister, Kompressor & Co nöd
brucht… Churzum mir sind ohni Zwüschefäll dur tüfschte Sand und schlammigi
Pools uf dä andere Site in Kasane acho… Dass äs aber guet anderst het chöne
cho, händ eus anderi Touris bewiese, wo stecke bliebe sind oder die Iheimisch
womer händ müese rette: die händ ihres Auto imene schlamige Wasserloch
festgfahre gha und händ d’Nacht im Auto müese verbringe (äs hegi nur so vo Leue
rundume gwimmlet)…
Tier hämer au in Hülle und Fülle gseh, wobi sich natürli
alles langsam wiederholt… Aber ade drü Leu-Mändli wo am Sandpisterand gschlafe
händ, hämer natürli glich riese dä Plausch gha… vorallem wo de einti ufgstande
isch und vor eusem Auto dureglofe isch :-) Aber au suscht isch es eus nonig
verleidet, stundelang am Wasserloch z‘hocke und zuezluege wied Giraffe trinked…
Froh simer au um euses Dachzält, dänn eimal meh sind eus im Chobe ide Nacht
d’Elefante und d’Hyäne go bsueche cho… Aber mer gwöhnt sich drah und chan dänn
doch zimli gli wieder ischlafe… Unagnehmer sind fast Temperature, dänn äs isch
wieder chälter worde und ide Nacht um die 0°, brrrr….
Mittlerwil simer in Kasane ade Chobe Riverfront acho… Au äs
wunderbars Plätzli, so diräkt am Chobe River… Natürli hämers eus nöd neh lah
und sind uf ä Sundowner-Flussfahrt go Hippo und Elephant mal vom Wasser her go
bestuune…
Botswana hät eus scho wieder eifach nur fasziniert, die
Wildnis isch eimalig und atemberaubend… Da mir mittlerwil aber i praktisch
allne Nationalpärk gsi sind, gahts für eus witer ines neus Land: Zambia :-)
0 Kommentare:
Kommentar veröffentlichen