Tag 6: Srinagar (Kashmir, India)

leider hät de monsun scho alli arbet gleistet und drum wird us eusem plan zerst mal an strand nüt... stattdesse sind mir mit em flüger spontan uf srinagar ide region kashmir... kashmir das sagt mir doch was.. mhhh... also i eusem reisefüehrer isch die region nöd beschriebe, es staht nur: „obwohl die kashmir-region bereist werden darf, raten wir von deren besuch ab“... und au im Lonely Planet tönts nöd besser: „the kashmiri insurgency is ongoing and it is essential to check security situation before travelling to the area around srinagar“ voila hämer natürli gmacht: drü verschiedeni inder händ eus bestätigt, dass es ä wunderschöni region seg und keis problem det ane zreise...

gemacht getan... doch eusi skepsis dere region gägeüber, isch churz nach de akunft in srinagar no dünkler worde... über all militär checkpoints und au de typ vo eusem huusboot isch nöd würkli vertrauenswürdig gsi... däzue isch cho, dass i dere region nur moslems läbet und nach jahrelangem chrieg mit pakistan, isch es anschienend schwierig sich uf d'bedürfnis und dä umgang mit europäische tourischte izstelle... however mir sind dänn mal ufs gröbste übers ohr ghaue worde... das und die negative beschriebige im Lonely Planet händ eusi gfühl zwüschet angst, skepsis, inneri unrue und unwohlsein schwanke lah...

leider hämer die knapp 3 täg in srinigar nöd würkli chöne gnüsse, obwohl d'region wunderschön wär und eigentlich im nachhinein eusi skepsis völlig unbegründet gsi isch...

Tag 2: Delhi (India)

adios amigos, namaskar India... voller vorfreud hät eusi reis ändli agfange... dä flug uf delhi hät ohni grösseri problem klappet und d'nadja hät mich wie abgmacht ufem delhi domestic terminal abgholt... die erste idrück vo indie sind fantastisch: die verschiedene grüch, die viele lüt und eifach äs riese chaos... wobi ehrlicher wis han ichs mir schlimmer vorgstellt... dänn sälbst für en laie hät das riese chaos irgend än art system, dänn alles gaht riebigslos anenand verbi...

bi eusne erste gehversüech i dem fremde land chömer eusi unsicherheit nöd verberge, aber immerhin fühlet mir eus wohl, da de inder doch i sinere art sehr hilfbereit isch... schnäll gfindet au mir euse platz i dem chaos... und zwar meistens am strasserand, damit eus keine überfahrt ;-) die paar wenige sehenswürdigkeite in delhi, machet die stadt nöd zumene „must-see“ und drum verwunderets eus nöd, dass es ussert eus praktisch kei anderi touris hät... wenn mer eus a dem erste tag scho nöd i delhi verliebt händ, dänn wenigstens schomal is indische ässe, wo eifach mega isch...

de erste istieg i euses neue läbe ohni job und fests dihei hät klappet und mir freued eus scho uf villi schöni erläbnis... mir sind froh hämer eus zum start für indie entschiede, au wenn dä kulturschock und dä kontrast zu de schwiz nöd grösser chönti si...