NADA goes HOME...

14. September 2010 - NADA goes HOME...

wir sagen dankeschön und aufwiedersehn... äs isch sowit... eimalig isch äs gsi, danke für alles feedback und's up 2 date halte... jetzt gahts mal zerscht hei und dänn schaun wer mal...

bis zum nächsten mal, bis es wieder heisst:
NADA goes WORLD...........................

Tag 478: Africa –> Schweiz

15 ½ mönät
68 wuche
478 täg
16 länder
9 paar flipflops (7 de däni und 2 d'nadja)
4 zält
45 büecher (39 de däni und 29 d'nadja)








und unzählbari idrück flüged mer wieder id schwiiz... Mer händ en unglaublichi ziit gha! Üse traum vonere grosse reis hämer definitiv gläbt und gnosse. Reise isch aber au nöd immer eifach... mer stosst a gränze und lernt sich und de reisepartner vonere andere siite känne... vorallem dänn wänn:

> s'ganze bett überseit isch mit chline chäfer
> mer x-stunde im stau hockt und mer keis änd meh drus use gseht
> armi chind eim um hilf bittet oder behinderti lüüt eifach irgendwo amne strosse egge sitzed & uf en spänd mit ässe hoffed
> d'lüüt i erbärmliche strohhütte läbet und mer schlüfet am obig i üses tüüre zält mit de guete schlofsäck
> mer binere 17 stündige busfahrt nüd bessers ztue häd als ständig müässe z'erbräche
> gäld während de busfahrt klaut wird und eim dänn niemer uf änglisch verstoht








ABER all die sache werdet gnau vo allne andere wunderschöne momänt verdeckt und vergässe... nämlich dänn wänn:

> d'mänsche eim vo wiitem zuewinked
> sich en herrlichi ussicht presentiert nach emne herte ufstieg uf en berg
> mer feini lokali menüs chan gnüsse
> mer eifach chan ufstoh und denn entscheide was mer hüt wett mache
> tierwält (ober- und underwasser) i all dene verschiedene kontinänte chan bestuune
> verschiedeni kulture erläbe und versueche z'verstoh (was nöd immer grad glingt)
> sich mit x verschiedene götter und religione usenand zsetzte (wo mer au nie wird verstoh :-)
> neui lüüt, öb iheimischi oder reisendi, känne lerne
> unberüährti natur oder en riese chaos stadt z'erläbe













genau all die faktore möched en reis us und macht sie so einzigartig. Jedes land häd üs uf sini art fasziniert. Am meiste beidruckt, überrascht und zum stuune brocht häd üs:

> indie
> neuseeland
> china
> botswana








d'wält isch riesig und mer schätzeds, dass mer scho sonen grosse und doch chline teil vo dere wält händ chöne bereise... und es isch bestimmt nöd die letzt reis gsi... s'reisefieber isch nonig gsunke :-)

herzliche dank a alli wo üs i dä letschte 15 ½ mönät begleitet und unterstützt händ... Mer freued üs uf üses neusti abentür: SCHWEIZ

NADA goes Southern Africa

s'südliche Afrika isch eifach än traum gsi: WM in South Africa, walking Safari in Swaziland, Tauche in Mozambique, Big 5+NADA und suscht niemert in Botswana, riesige Wasserfall in Zambia und roti Düne in Nambia.... än chline Zämeschnitt vo üserer Reis ufem schwarze Kontinänt:

Tag 470: Namib Desert / Sossuvlei (Nambia)

vor tusige vo jahr händ Überschwämige Kalahari-Sand vo Botswana via Südafrika in Atlantik gspüehlt... dä chalti Benguelastrom hät dä Sand nach Norde treit, wo dä starchi Wind ade Küste vo Namibia däfür gsorgt hät, dass sich ä neue Wüesti bildet hät: d'Namib...

Hüt isch dä Namib-Naukluft-Park (grösser als d'CH!!) ä wundervolli Wuestelandschaft mit Düne soweit das Auge reicht... Vorallem d'Region um Sossuvlei isch wie äs Bilderbuech... Blaue Himmel, roti Sanddüne und uströchneti Salzseeä mit abgstorbne Kameldornbäum – kontrastricher gahts nüm...

Das D'Wüesti nöd nur us Sand bestaht, hät eus dä Guide Tommy uf dä "Living Desert" – Tour zeiget... höchst interessant was mer für Tier im Sand gfindet, wenn mer weiss wo und wie sueche (Schlange, Kamäleon, Echse, Chäfer,...) au d'Nadja hät a dene Tierli super dä Plausch gha :-)

Tag 462: Etosha Nationalpark (Namibia)

Mit em Mami Nadja und äm Mario hämer s'letschte Kapitel vo "NADA goes Africa" in agriff gno... Als erschts ufem Plan isch das Highlight vo Namibia gstande: dä Etosha Nationalpark... und äs isch würkli extrem viel "WOOOWWW" gsi...


da mir nach drü Mönet Afrika scho chli verwöhnt gsi sind mit Tier, hämer vorallem mal richtig viel Leue welle gseh... Tja, de Task hät sich dänn doch als nöd so eifach usegstellt: vo sunneufgang bis sunneuntergang (und no länger, will d'wasserlöcher bim camping sogar belüchtet gsi sind) hämer nach äm "König der Tiere" usschau ghalte... aber erscht am 5tä Tag simer belohnt worde, und wie: mir sind nüme nahcho mit zelle wie viel leue äs schlussändlich gsi sind... dä ganzi Tag hämer überall und immerwieder die wunderschöne Tier chöne beobachte!


Highlight isch gsi wo mir ä Gruppe vo 14 Leue händ dörfe ganz ällei für eus ha, wills vor eus d'Strass überquert händ :-) äs eimaligs erläbnis...

Mir sind ja bekanntlich nöd am Ferie mache, sondern am Reise (grosse Unterschied!!!!) und so dörf mer au mal s'eint oder ander hinterfröge! so wunderschön dä Etosha au isch, au de Park isch 1970 umzüünt (850km!!!) worde... als Folg isch dä Migrationszyklus vo einige Tier unterbroche worde, d'Tier händ idä Summermönet kei Wasser meh gfunde und die abgraste'Wiesene händ sich nüme chöne erhole und sind versteppt... Um Kies fürd d'Strassene dur dä Park z'gwünne, hät mer grossi Löcher grabe, wo sich spöter mit Rägewasser gfüllt händ und zur Bruetstätti vo Bakterie worde sind... All das hät über hunderttusig Tier s'läbe kostet...

Dä Etosha isch än wundervolle Park, mer dörf aber eifach nöd vergässe, dass vor paar Jahrzähnt zum Bispiel no 10x meh Gnus und drü mal meh Zebras idere Region gläbt händ.........

Tag 453: Victoria Falls (Zambia / Zimbabwe)

ade Gränze zwüsched Zambia und Zimbabwe gfindet mer eis vo dä total 890 UNESCO Welterbe, nämli d'Victoria Falls... das isch dä breitischt einheitlich herabstürtzendi Wasserfall vo dä Wält :-) uf änere Länge vo 1.7km stürtzed millione Liter Wasser vom Zambesi-Fluss 110m id Tüfi, da dägäge isch dä Rhifall grad äs Rinsal :-)... mir händ eus zwar nöd drunder gstellt, sind aber au so pflutsch nass worde... nach vier Wuche ununterbrochne Sunneschi äs wahrs Vergnüege :-)

Tag 451: Chobe National Park (Botswana)

Dä Chobe Nationalpark im Nordoste vo Botswana isch meh als ein Viertel so gross wie d'Schwiz und vorallem bekannt für die ville Elefante... zur Zit läbet det nämli über 50'000 vo dä graue Riese...


mir händ ja mittlerwil doch dä eint oder ander Park und au s'eint oder ander Tier gseh... aber was sich a de Chobe Riverfront für äs Spektakel abspillt, hät eus doch meh als beidruckt... Da händ sich nämli hunderti vo Wasserbüffel, Elefante, Hippo's, Vögel und Antilope anänader greiht und das uf wenigä hundert meter...


und ändlich, ändlich (nach 80 Täg Africa!!!) hämer au alli "BIG 5" chöne abhögle... dä Büffel, dä Elefant und s'Nashorn hämer scho massehaft gseh, aber erst jetzt hät sich mal dä Leu und dä Leopard zeiget...


Somit chömer mit gueten Gwüsse das wundervolle Botswana verlah (äs isch schlicht AMAZING gsi) und eus via Victoria Falls (Zambia) as vorläufig letschte Kapitel in Afrika mache: Namibia...

Tag 448: Okavango Delta (Botswana)

nach 1'700km verdunstet dä Okavango-Fluss im glichnamige Delta, irgendwo idä mitti vo Botswana am Rand vo dä Kalahariwüesti... S'grösste Binneflussdelta vo dä wält isch eis vo dä grösste und tierrichste Füechtgebiet vo Afrika...

Für eus nöd so guet, für d'Locals und d'Tier natürlich herrlich, häts Delta zur Zit soviel Wasser wie sit über 30 Jahr nüme... So isch es schwieriger gsi für eus ad Tier anezcho, aber mir sind bei weitem nöd enttosche worde...

Wer sich wie mir kei Lodge (500$ pro Nacht und pro Person ufwärts) im Delta chan leiste, de padlet imene sogenannte Mokoro durs Delta... gschlafe wird natürli z'mitzt idä Wildnis im Zält, wos nur so vo Tier wimlet :-)

Ums ganze Deltaabentür abzrunde, hämers eus nöd neh lah und än chline flüger chartered wo eus chli über die einmalig Landschaft gfloge hät...

Mir händ eus gfühlt wie imene Fotobilderbuech... än Traum die Landschaft vo obe z'gseh und eimalig wenn mer über die villne Büffel, Elefante, Giraffene und Nilpferd chan flüge...

Tag 439: Moremi Game Reserve (Botswana)

s'Moremi Game Reserve isch eini vo dä Top Destinatione in Botswana, drum simer natürlich au det eimal meh uf Löwensuche... zum's voreweg neh, mir händ scho wieder Päch gha :-) däfür hämer inere wunderbare Lodge än fantastische Campingplatz gfunde gha mit private-open-air-duschi :-)









tierwält isch dänn doch nöd so supersuper gsi, wie gross aprise :-) immerhin riese herdene mit hunderte elefante und dutzendi giraffene sind eus begägnet... äs isch sowit cho, dass d'nadja mal wieder im Auto gschlafe hät, will ide nacht d'elefante und d'hyäne eusi campsite mit eus händ welle teile :-)


au als rally-pilote hämer fortschritt gmacht... während alli um eus ume, im sand, schlamm oder idä wasserlöcher stecke bliebe sind, häts bi eus für eimal kei unerwünschti zwüschestopps ghe :-)

Tag 431 – 437: Nxai Pan / Makgadikgadi NP

Mit nur grad knapp 1.9 mio. Iwohner und das binere Flächi so gross wie Frankrich, chan mer sich vorstelle, dass Botswana vorallem us änere wite Einödi bestaht...84% vo Botswana bestat zudem us Kalahari-Wüesti... und mitte drin häts die grösste Salzpfannene vo dere Wält, überbliebsel vomene uströchnete Steizitsee...


eifach wunderschön die witi und zmitzt ine ä insle mit Baobab-Bäum... und NADA am campe :-)


Rund um die Salt-Pans häts vorallem Sand... und so isch es cho, dass mir irgendwo im Niemandsland üse Super-Jeep im Sand versänkt händ... alles budle hät nüt gnützt, doch churz vorem verzwiefle isch dänn doch no Hilf in Form vomene andere Auto uftaucht...


äs hät aber nöd nur Sand, sondern hin und wieder au äs wasserloch... und wills trochezit isch teiled sich alli mögliche tier die wasserlöcher glichzitig... so chunnts das idä Nxai Pan eus bim z'nacht ässe än Elefant ufgschücht hät, wills i dä nöchi vo eusem zält ä chlini pfütze wasser gha hät...


Idä Region vom Makgadikgadi NP häts die grösste Zebra- und Gnu-Herdene... und wenns wie jetzt nur no im Boteti-River Wasser hät, dänn mached sich 10'000igi Zebras a die einzigi Wasseradere wit und breit... äs fantastischs abentür, wenn mer vo hunderte vo zebras umringt isch...

Tag 430: Khama Rhino Sanctuary

Ufem Weg id witene vo dä Kalahari-Wüesti hämer Halt gmacht imene wunderbare Rhino Park... Mit äs bitzli glück chan mer det nämli Nashörner gseh... Und mir sind nöd enttosche worde:


mit em bewaffnete Ranger hämer eus dänn sogar z'Fuess uf d'Suechi gmacht... nach stunde langem fussabdrück folge, hämers dänn au tatsächlich gfunde... aber nöd nur Nashörner, sondern au Giraffe und jediglichi Antilope-artene... :-)

Day 422: Praia do Tofo (Mozambique)

Einisch meh hämer Ferie vo de Ferie gmacht. Für das hämer üs wie sardine inen voll gstopfte bus ghöckt und sind 8 stunde uf meh oder weniger teerte stross richtig tofo gfahre.


die eher unagnehm busfahrt häd sich meh als glohnt. das chline dörfli mit de sandige strasse und emne gmüäs- & fischmärt häd üs nöd entosche. uf emene sandige campingplatz mit ussicht ufen palmewald hämer üsi 4 wänd für zwei wuche ufgstellt. de strand isch wunderschön und fast mänscheleer gsi...


was üs aber viel meh fasziniert hät sind d'meerestier gsi: delfine, schildchrotene, riffhaie und rieseroche... sogar vom strand us hämer chöne gumpende buckelwale zueluege... und wänn denn eine 10 meter hinderem dani uftaucht nach emne tauchgang, ja dänn schloht jedes taucherherz höcher...


s'meer isch do sehr wild und jedi bootsfahrt isch die reinsti tortur gsi, aber dhoffnig au no en walhai chöne zgseh hät üs jede morge ufs meer zoge... doch leider häds das mol nöd klappet... walhaie mer chömed wieder ;-)

Day 407: Mlilwane NP (Swaziland)

s'Königrich Swaziland isch mit 600'000 iwohner so zimlich unbekannt... Gnau darum hämer dem wunderschöne Land welle äs paar Täg widme... Cho simmer wägem Mlilwane Nationalpark, nöd wills det bsunders viel Leue und Leoparde hät, sondern wills ebe gar kei Raubchatze hät... Us dem Grund dörf mer nämli (im Gägesatz zu dä Parks in Südafrika, womer nur mit em Auto dur d'landschaft fahrt) chrüz und quer durs s'Reservat wandere...

Ganz ungföhrlich isch es da aber au nöd: Fascht wäred mer drufgstande, aber im letschte Augeblick hämer das 5m lange Krokodil dänn doch no gseh und än riese Boge drum ume gmacht :-)

Äs isch ächt än wunderschöne Park... so nöch a Zebras, Kudus, Impalas und Co chunnt mer suscht eigentlich nöd...

Highlight vom Park sind aber d'Hippos... die gseht mer immer wieder... meistens liggets ful ume oder sind am frässe... usserd wenns ne z'warm isch, dänn hüpfets rasch is Wasser :-)