Tag 154: Victoria Falls, Zimbabwe

Wenn mer sich scho entlang äm Zambesi bewegt, dänn ghört än Bsuech bi de Victoria Falls zu jedem Reiseprogramm. Da mir bi eusem letschtä Afrikatrip die pompöse Wasserfäll vo de Zambia-Sitä aglueged händ, simer dasmal uf Zimbabwe um das Unseco-Weltnaturerbe go bestuune…

D’Wasserfäll ade Gränze vo Zambia und Zimbabwe sind mit 110m doppelt so höch wie d’Niagarafäll und mit 1‘708m guet anderhalbmal so breit (da chan de Rhiifall mit 23m Höchi und 150m Breiti grad ipacke)...Guet 4 Mönet nach de Rägeziit hät s’Wasser usem Izugsgebiet dä Wäg zu de Victoriafalls gfunde und dä Wasserpegel isch momentan grad uf Höchststand… Einersiits äs Spektakel wenn soviel Wasser id Tüfi stürzt, anderersiits häts aber sone Gist (erkännbar no in 30km Entfernig!!), dass mer vor luuter Näbel nöd ganz so viel vo dä Fäll gseht und entsprächend nass wird! Isch grad wieder äs agwohne ad d‘Schwiiz :-) Mir sind so oder so eimal meh begeisteret gsi….
 

 

Tag 151: South Luangwa National Park, Zambia

Eigentlich hämer eus die 10h Autofahrt pro Weg wellä erspare und äm South Luangwa Nationalpark im Norde vo Zambia kein Bsuech abstatte… Aber nachdem unzähligi Travellers gmeint händ mir müesed unbedingt gha, hämer de wiiti wäg uf üs gno… und äs hät sich glohnt, äs isch sonen traum gsi, dass mer grad 6 nächt bliebe sind :-)

Obwohl eus am Afang nöd ganz so wohl gsi isch: Mir händ grad fertig g'ässe gha, da chömed vier Elefante z’laufe… is WC-Hüsli hämer üs nöd chöne rette, will vo dere richtig sind d’Elefante cho! also simer schnäll is auto gumpet… d’Elefante händ nöd drah dänkt eusi campsite z’verlah, sondern händ gemütlich euses Auto untersuecht… Doch äs komischs gfühl wenn än Elefante-chopf uf de motorhube isch und mit em Rüssel üses Autodach absuecht… Mir händ dänn müese erfahre, dass au scho Auto ufbroche worde sind vo Elefante (will frücht offe im Auto gläge sind)!!! Eusi sind aber wieder friedlich abzoge :-) Tja und so isch äs dänn witer gange, will jede Abig isch mindestens ein Elefant cho go äs Bsüechli abstatte… Dem nicht genug, dänn au d’Hippos händ immer wieder versuecht uf eusem Raseplätzli z’grase… :-)

Bekannt isch dä South Luangwa vorallem für die grossi dichti a Tier womer gseht… und au mir sind nöd enttüscht worde… Tausende Hippos händ im Fluss bädelet, vögel in hülle und fülle, alli paar Kilometer isch mer wieder ämene Elephant oder Büffel über de Weg glofe und Antilope häts sowieso unzäligi gha… Mir händ aber ghofft ändli "d’Big 5" chöne z’komplettiere, will de leopard hämer nonig gseh… und mir sind für eusi wiite areise meh als nur entlöhnt worde… schlussändlich hämer im ganze 8 leoparde (dävo 4 jungi), 9 Leue und sogar die üsserst sältene "buschschwein" dörfe beobachte…

dä south luangwa hät ghalte was versproche worde isch... einersiits wäg de viele Tier, aber au wäg dä wunderbare landschaft und äm traumhafte campingplatz diräkt am fluss mit permanäntem usblick uf Hippos und suschtigi tier wo am flussufer sind go trinke - amazing.......

 

 

 

NADA goes CHINA & TIBET...

Tag 144: Lake Kariba / Lower Zambesi, Zambia

Nachere wunderbare Nacht im Hotel in Lusaka (nach 4 Wuche ufem Mätteli schlafe ä Wohltat) isch äs richtig Lower Zambesi gange, ad Gränze zu Zimbabwe… Leider isch dänn aber d’Fähre (oder besser gseit die schwümendi Plattform mit Motor) über dä Fluss grad kaputt gsi… eimal meh häts gheisse „no hurry in africa“… wenn die wieder lauft, ja das hät natürli niemert so gnau gwüsst :-)

Tja, da simer grad chli is schwitze cho, weil a dem abig d’schwiz gäge ecuador gspillt hät und mir extra glueged händ, dass mer ufemäne camping mit TV sind… Plan B isch gsi umchere und richtig lake kariba fahre, ide hoffnig äs hegi dete au en TV… aber natürli häts ufem einzige camping dete kein TV gha… mir händ eus dänn churzerhand id bar vomene Resort gschliche und händ dete dä CH-Sieg dörfe miterläbe :-)

„nadagoeslonely“ – das mir in China meistens ällei sind, isch eus ja no klar gsi… aber das mer in afrika uf praktisch kei touris trifft, isch mit de ziit dänn doch chli langwilig (mit chli glück gfindet sich ab und zue mal än südafrikaner)… und so simer au am lake kariba, eine vo dä grösste stauseeä vo dä wält und eigentlich ganz äs hübsches plätzli, eimal meh die einzige gsi ufem campig :-(

Tja und drum hämer tagsdarauf numal än versuech unternoh über de fluss an lower zambesi zglange… und siehe da, die fähre isch gflickt gsi und mir händs doch no uf eine vo de schönste camping vo euserer reis gschafft: freii sicht uf dä zambesi, unzähligi hippos im fluss, elefante (zum glück) uf dä andere flusssite, swimmingpool und sogar einigi anderi touris häts gha, um äs paar Reiseanekdote chöne usztusche… fascht chli äs paradis gsi... entsprächend au euses Verhalte, umeligge, im pool bädele, sünnele, läse, ässe, fuessball luege und zur krönig no än sunset cruise mit sundowner :-)

 

Tag 140: Kafue National Park, Zambia

Gränzübertritt sind im allgemeine rächt spannend, jede isch chli anderst, de eint chaostisch, dä ander gordnet... meistens isch es aber äs rächts puff und mer weiss nöd so rächt womer ez ane mues... umso schlimmer wirds wenn mer äs auto däbi hät:
s'uscheckä in botswana isch ruckzuck gange und wie nüt simer scho uf dä fähre über de zambesi gsi, wo eus uf zambia bracht hät... und dänn isch es los gange... task-no. 1: fähre zahle und quittig engägeneh - OK! dänn ufd imigration gos visum hole, task-no. 2 - OK! dänn zum zoll, de meint mir brücked ä 3rd-party-insurance... ok, versicherigsbüro sueche und versicherig abschlüsse... leider nur zahlbar in zambia-währig... gäldwächselbüro isch natürli zue und au dä bancomat git kei gäld... also wird gäld uf de strass, zumene hervorragende kurs, gwächslet ;-) guet, versicherig zahle, task-no. 3 - OK! zrugg bim zoll wird dä TIP usgstellt (zerscht mues mer sich aber no im grosse buech vo hand iträge)... dä TIP (temporary import permit) chostet natürli au.. zahlbar nur in zambia-währig... das wüssed mer wies lauft, das heisst wieder go gäld wächsle uf de strass... voila und task-no. 4 isch erledigt - OK! dänn witer ufs nögste büro go carbon tax zahle, was sogar in US-$ möglich isch (wär hätte das gedacht)... dä zädel isch fix gange, task-no. 5 - OK! weiter gehts, dänn d'strassevigniette (oder so ähnlich) fählt no... und genau, zahlbar in zambia-währig... damal hämer aber mitdänkt und bizeli meh gäld gwächslet, sodass mer nüme ufd d'strass müend... task-no. 6 - OK... Stunden später und 200$ liechter hätt dä maa s'grosse tor ufgschlosse und eus uf zambia inelah :-) mit gelassenheit und humor, isch dä gränzübertritt ä zimli amüsanti aglägeheit gsi :-) "no hurry in africa"

Kurze Zwüschstopp in Monze und dänn isch es in Kafue Nationalpark gange... Gross aprise isch er worde: Highlight vo Zambia, viel Wildlife, bekannt für Leoparde, etc. etc... Tja, Leoparde oder suschtigi Chatze hämer natürli kei gseh... und eigentlich au suscht nöd allzu viel Tier... aber schön isch es trotzdem gsi... mit Campingplätz diräkt am Kauferiver hämers so eifach mal chli gnosse nüt tue, grilliere und d'Stilli gnüsse... wobi mit de Stilli isch es schnäll verbi gsi... äs Hippo isch eus nämbli bim Z'nacht cho go störe und hät es Bsüechli welle abstatte... Und da d'Hippos die gföhrlichste Tier in Afrika sind (no vor Elephante, Leu und Krokodil) simer schnäll is Auto gumped... s'Hippo hät dänn aber zum Glück gmerkt, dass mir kei Gsellschaft wend und hät sich wieder in Fluss zum bädele verzoge :-)

Bizli Tier hämer dänn doch no gfunde.. vorallem viel verschiedeni Antilope-Arte häts gah, sogar sötigi womer no nie gseh händ... Aber suscht isch es eher nöd so spektakulär gsi... au än usflug mit em Ranger hät nöd viel bracht... bis uf än Elephant wo chli agressiv gsi isch und euses Auto verfolgt hät :-) Aber de Ranger hät gmeint "no worries, is not dangerous"... wenn der mann das sagt :-)