Tag 305 - 309: Jiuzhaigou NP - Huanglong NP - Songpan

de tipp hämer vomäne alte traveller übercho (gracias schmeh) und chönd de nome wiiter gäh: Jiuzhaigou Nationalpark!!! No sälte hämer so en beidruckendi see-fluss-wasserfall-landschaft gseh, eifach wooow...

De nationalpark liit zwüsched 2000 – 3000m und isch no mit schnee übersät gsi, so simer im 2010 au no zu üsem erste wiis cho. Aber entsprächend sind au d'Temparature gsi - einisch meh simer froh gsi um üsi chappe und händsche :-) Tüüf blaui seä, so klar dass mer jede stei am grund gseh häd und wasserfäll wo über moos abeprasslet sind.

Mit zwei chinesli hämer üs es taxi gnoh und händ no de Huanglong Nationalpark bestuunt. Leider sind die tuusige wassertümpel und wasserfäll im winter vorwiegend ustrochnet. So isch üs nüd anders übrig bliibe dä 500m steili astieg uf 3500m azträtte... Zum glück häds suurstoff-bare ufem wäg gha, de dani und ich hättet aber lieber es zwätschge gnoh, als än suurstofffläsche :-)) d'obe acho häd üs en traumhafti poollandschaft erwartet mit himmelblauem wasser...

Vo Songpan, emne hübsche dorf uf 2800m, simmer wieder id zivilisation nach Chengdu. Die busfahrt häd sich zum albtraum entpuppt. Vo 360 km sind ca. 280 km schotterpiste mit vielne ei-spuurige passage gsi, so dass die viele autos, lastwäge und büs nüm anenand verbi cho sind und es riese chaos verursachd händ. Jede häd gmeint er chöng doch au no überhole und sie händ nöd begriffe, dass de gägeverchehr denn eifach nüm düre chund...so häd's es gäh, dass mer 2x drü stund ade gliche stell gstande sind. Anstatt 8 stund hämer sage und schreibe 20 stund imne bus mit chodernde chinese verbrocht...

Tag 303: Chengdu (China)

... pandascheisse und hasenköpfe ...

nach 10 mönet ohni arbet händ mir dänkt mir versuechts mal wieder mit schaffe... au wenns nur für ein tag gsi isch :-) und zwar händ mir eus für äs freiwilligs-panda-hüeter-praktikum gmolde... mit über 80 panda's isch in chengdu eis vo dä grösste ufzuchtstatione vo dä wält (wältwit läbet ca. 300 panda's in ufzuchtstatione und zoo's, in freier wildnis no ca. 2500)

so häts am morge früe als ersts gheisse, chäfig putze :-) s'schöne a dere sach isch d'pandascheisse gsi... die hät nadja nämli fein säuberlich müese zäme sammle, je nach mängi gfindet mer nämli use wies am panda gaht... nachher wird is panda-g'häg frisches bambus parat gleit (dä panda ist zu 99% bambus und zwar pro tag bis 20kg)... natürli hät dä panda au gern anders und so hämer d'pandas au mit öpfel und ämene spezielle vitaminchueche dörfe füettere...

dä tag als praktikantä isch sehr idrücklich gsi und hät mega spass gmacht... denn mer hät än blick hinter kulisse chöne werfe und isch dä pandas chli nöcher cho... mir händ riese spass gha ade pandas und die hoffentlich au a eus...

hüt isch würkli än tierliebe tag gsi: am abig, binere liecht bier-ige runde, meint dä mix (bsitzer vom glichnamige hostel) es segi zit für än snack... und zwar für ä spezialität vo dä region: än hasechopf... ja puhhh, mhhhh... da d'begeisterig am tisch rächt gross gsi isch, hät dä gruppedruck gwunne und so hämer au müese dra glaube... inere ganz spezielle technik isch dä chopf seziert und g'ässe worde: bäggli - zunge - pilgerä - auge - hirni... hört sich ecklig an, wars auch... zum glück isch das ganze inere scharfe sose gsi und so isch es nöd mal so schlächt gsi ;-) jaja der chinese, de isch würkli ganz anderst drauf wie wir....

hüt staht äs chlises jubiläum a... NADA isch 300 tägs ununterbroche unterwegs, so quasi halbzit ;-) reisemüed simmer nonig... mir stossed a, uf die unvergässliche letschte 300 täg...

d'region um xi'an isch scho vor über 6000 jahr besiedlet gsi und die sehr modern 4-mio.-Stadt isch jahrhunderte lang d'zentrum vom chinesiesche rich gsi... mir händ d'überbliebsel vo dazumals für äs velotürli gnutzt: rund um und uf dä ehemalige stadtmur hät mer nämli än prima überblick über d'stadt becho...

au äs bergtürli hät nöd dörfe fehle... uf äm program isch dä "hua shan" gstande, eine vo dä 5 heilige berge vom taoismus... mir fröged eus wems in sinn cho isch uf über 2000m obe, links und rächts gahts nur s'loch ab, hunderti träppene z'baue?!?!? versteh einer die chinesen!!! apropos, dä chines chunnt da ufe und montiert äs schlössli mitemne rote band, als zeiche ewiger liebe... :-) s'bescht a dem trip isch dänn aber d'rückfahrt uf Xi'an gsi: wägemene liechte verkehrchaos, händ mer für läppischi 120km ganzi 7h gha!!!! tzzzz....

highlight vo Xi'an sind aber ganz klar "terracotta warrior"... nöd ume suscht als 8. wältwunder betitlet, isch die archeologischi stätte erst 1974 entdeckt worde... über 8000 mänschegrosse Krieger us Ton (und kein krieger glicht am andere) hät de herrscher Qin Shi Huang (200 AD) um sis Grab ufstelle lah... das damit er au im jensits hät chöne witer hersche!?!?! eimal meh: versteh einer die chinesen... wie au immer, äs isch also absolut beidruckend...

Tag 294: Yangshuo (China)

die zweiti station in china isch die wunderschön umgäbig vo Yangshuo gsi. Glücklicherwiis isch jo überhaupt kei hochsaison und so hämer das hübsche dörfli Yangshuo und die chline herzige romantische, buredörfli ganz für üs elleige gha.

Mit em velo & zfuess hämmer 5 täg lang die idrücklich hügellandschaft erkundet, en chinesische chochkurs bsuecht (natürlich ohni hund & hüähnerfüäss) und üs vo de strosseverchäufer chappe und schaal atrülle loh. jep, es isch würklich sehr chalt da.

Tag 289: CHINA

YEAH, ändlich hämer üses visum für nach china im pass und fahred mit em nöchste bus vo vietnam nach china. Nach 9 stund bus fahre simmer in Nanning üsere erste übernachtigsstation in china acho. Mer händ gmeint mer chämed imne chline dörfli a, aber vo dem isch nüd (meh) z'gseh gsi. En riesigi wolkechraterstadt mit neuste blöck und gebäude hät üs empfange. Das elleige heisst aber nöd, dass d'lüüt besser änglisch chönd... 1. zugticket chaufe häd sich sehr chinesisch usegstellt. Es häd kei einzigi tafele gha wo irgendöpis uf änglisch a gschriebe gsi wäri. Aber mit üsne bereits 4 glernte chinesische zeiche hämer löcke es ticket übercho ;-) übrigens chan en durchschnitts chinese öpe 7000 – 8000 zeiche ....mer händ en lange wäg vor üs....

Tag 288: Sapa / Halong Bay (Vietnam)

als mittlerwil erfahrni wandervögel hät än bsuch in Sapa natürli nöd dörfe fehle... äs bergdörfli uf 1650m im norde vo vietnam... villi traveller händ eus vor näbel und chüele temperature gwarnt... aber wenn NADA id berge gaht chan ja nüt passiere... und so isch es gsi: agnehm warm, sunneschi und besti trekkingbedingige... leider händ die tusige risfälder nöd grüen glüchtet... und leider hät mers trekking au nöd würkli trekking chöne nänne, eher gemütliches spazieren gehen... aber trotzdem isch äs än wunderschöne usflug gsi... nöd zletscht will mer ä guets trüppli binenand gha händ wo all gern reiswein trunke händ :-) aber au will eus di iheimisch gastfamile und eusi guide-in üs rundum versorgt hät...

als letschti destination in vietnam (scho wieder isch än monet ume... tzzz...) isch halong bay ufem programm gstande... au da händ eus anderi reisendi vor schlächt wätter und schlächte trips brichtet... und wieder hämer glück gha... euses boot womer 3 täg umetuckeret sind, isch wunderbar gsi... und au swätter ganz prima... und so hämer die tusige kalkfelse wo usem wasser raged chöne bestune... leider isch das UNESCO Wälterbe chli mit touris übersät und dä abfall schwümmt au überall ume... aber dennoch ghörts zu dä highlights vo "NADA goes Vietnam"

NADA goes KIWI...

än ganze monet simmer im wunderschöne Neuseeland umkurft... gfalle häts eus meeega... für än chline zämeschnitt guckscht du Video "NADA goes KIWI..."

travellerprobleme...

Wer meint dä traveller-alltag bestehi nur us frage wie: „was mached mer hüt? Wo gömer go ässe? I wellem hotel übernachtet mer?“ de isch grundsätzlich nöd falsch... aber hin und wieder gits au anderi problem zum löse... drum än chlini iblick i eusi andere travellerproblem:


unehrliche vietnamesen...

morge am siebni... euse bus chunnt nach 14h fahrt in hanoi a... um dä vielzahl a wartende hotel-schlepper zentgah, hämer bereits äs hotel bueched... mir wähled per zuefallsprinzip än taxifahrer us... ufd frag wie türs seg i euses hotel, meint er nur: „meter“ (bedütet: er heg än taxometer)! bevor mer losfahred, dä obligat kontrollblick ob dä meter a uf null isch, mir sind ja nöd blöd... nur dä taxifahrer au nöd! mehr...

Tag 281: Hanoi (Vietnam)

Wer meint dä traveller-alltag bestehi nur us frage wie: „was mached mer hüt? Wo gömer go ässe? I wellem hotel übernachtet mer?“ de isch grundsätzlich nöd falsch... aber hin und wieder gits au anderi problem zum löse... drum än chlini iblick i eusi andere travellerproblem:


unehrliche vietnamesen...

morge am siebni... euse bus chunnt nach 14h fahrt in hanoi a... um dä vielzahl a wartende hotel-schlepper zentgah, hämer bereits äs hotel bueched... mir wähled per zuefallsprinzip än taxifahrer us... ufd frag wie türs seg i euses hotel, meint er nur: „meter“ (bedütet: er heg än taxometer)! bevor mer losfahred, dä obligat kontrollblick ob dä meter a uf null isch, mir sind ja nöd blöd...
nur dä taxifahrer au nöd! und so plaziert er euses gepäck genau äso, das mer nüme uf dä meter gsehnd! am zielort acho, hilft dä taximänsch eus usstiege, macht ä hohli hand und meint 290'000 dong (ca. 14$)... eusi antwort: „spinnsch eigentlich, die 4km langi fahrt chostet normal 2-3$“... das isch ihm zimli glich und er zeigt uf dä meter... mhhh, de zeigt tatsächlich de pris wo er verlangt und näbet dra die gfahrni distanz: 37.8km... alles diskutiere nützt nüd, de ma verstaht natürli kei änglisch!!! die 5$ womer ihm abütet nimmt er wohl in sack und meint es fehled no 9$... tzzzz... au wo mir afanged föteli mache vo sim auto und sim taxifahrer-uswies, bliebt er cool und wet sis gäld... mir laufed dävo is hotel, er folgt eus und rüeft vo witem am typ ade reception: euse bus hegi ä panne gha und er heg eus vo wit usserhalb müese id stadt fahre... mit äm receptionischt als übersetzer gaht d'diskusion witer... obwohl er lügt bis äne use, bestaht dä taxifahrer uf sis gäld... mit de wort: „du bisch en verdammte lügner, da häsch halt numal 5$, aber das wird konsequenze ha“ bringed mer dä taxifahrer los... uf sine mulwinkel wiederspieglet sich eher die zusätzlichä Dollar, als eusi drohige...

einige stunden später: eus laht di sach kei rue... und so fröged mer de liebi herr receptionischt ob er nöd chönd bi dä taxigsellschaft alüte und sich i eusem name beschwere... er macht das gern und nach langem hin und her isch eusi beschwerde plaziert... immerhin...

weitere stunden später: euses telefon im zimmer lütet... d'reception, mir heged bsuech... mhhh... vorem hotel stat än maa im azug und stellt sich als manager tony vo dä taxigsellschaft vor... i guetem änglisch entschuldigt er sich in aller form, und das öppe 10x... au de taxifahrer welli sich no entschuldige... de chunnt hinterem egge füre und entschuldigt sich au mehrmals hinter äm rugge vom tony... dä tony überreicht eus 5$ und fangt wieder mit dä dauer-entschuldigung a... damit wieder alli glücklich sind und ihres gsicht chönd wahre, bedanked mir eus rächt herzlich und versichered äm tony die sach seg für eus somit erlediget und vergässe :-)


ehrliche schweizer...

in südostasie gfindet mer a jedem touriort buechverchäufer... die verchaufed jedoch alles nur kopie... die kopie sind dänn aber amigs vo tiptoper qualität... churz nach em chauf vo sonere raubkopie (reisefüherer vo vietnam), holt eus s'schlächte gwüsse i und mir schwöred eus, das business nüme z'understütze und ab sofort nur no ächti „lonely planet“ zchaufe...
nachdem dem das mit em visum für china klapped hät, händ mir natürli sofort ä neui „bible“ brucht... s'traveller ein und alles: än neue lonely planet für china... natürli chunnt nur än ächte in frag! tja, schwieriger als gedacht... än ganze tag simmer in hanoi umekurft, händ etlichi buchläde abklapperet... original reisefüehrer gits i dem land definitiv nöd!! ohni erfolg hämer zu de muetter am strasseegge müese und händ eimal meh (für 4$) ä kopie vom lonely planet china postet...